21 Azer- Yirmibir Azer
Pişeveri (Pishevari, Pishavari), Azerbaycan Démoķrat Firqesi (ADF) ve Azerbaycan Milli Hökümeti (AMH) Görüt, Belge, Yazı ve Araşdırma Saxlancı


Wednesday, April 16, 2008  



اونوتقانليغيميزلا بيگانه ليييميز آراسيندا ؟!!!- اولوس

ايسماعيل شمس بلکه ده چوخلارينا آنجاق بير آددير. ساده جه اولاراق بير آد. آمما اونوتماياق هر بير آدين، بير تاريخچه سي و بير حئکايه سي ده واردير. ائله مني ده دوشوندوره ن بودور. نده ن حئکايه ني و تاريخچه ني ساده جه اولاراق يازيليب سونا چاتديقدان سونرا اوخوماق مجبورييتينده ييک؟! هله حئکايه لرين بيزه نفعي اولماديغي زامان اوخوماديغيميزدان سوز آچميرام.








بو اوزون و شاختالي بير قيش گئجه سينده، ايسماعيل شمسله قيزينين اٶلدورولمه سي اونوتقانليغيميزلا بيگانه ليييميز آراسيندا اولان مسافه نين نه قده ر ده قيسسا اولماسيني بير داها دا خاطيرلاتدي منه. ياخين گئچميشيميزين قانلي قادالي گونلريني ياشادان، غلبه نين سئوينجيني ياشامادان مغلوبييت آغيرليقلاريني اٶز چييينلرينده داشييانلار بئله بير اٶلومه لاييقيديرلر مي؟! نه واختا قده ر دامارلاريميزدا آخان قانلار ائله پنجره شوشه لري نين او اوجوندا هر طرفه ياييلان بوزلار کيمي دونموش قالاجاق؟! هر بير قيشين آرخاسينجا گله ن يازي نه واختا قده ر ساده جه اولاراق گٶزله مه ليييک؟!...

کيمسه ني محکوم ائتمک ايسته ميره م. بئله بير دوشونجه ده اصلن بولونماميشام. هر نه دئييليرسه، هر نه يازيليرسا ائله بيرينجي اٶزومه عاييد اولماليدير...

اونو ايلک دفعه باکي`دا گٶرموشدوم. هر بير گونئيلي ايله تانيش اولارکن، سئوينجله دولو باغرينا باسماغيني کيم اونودابيله ر کي. ياشي چوخيدي، يولو دا چوخ اوزاق، آنجاق ياشينا اويغون اولمايان جلدلييي اونوتماق دا اولمور.

"اييرمي بير آذر"چيلر تاپميشديرلار اونو دئييره م، آنجاق بيليره م "تاپيميشدير" سوزو اويقون بير سوز ساييلماز هر حالدا. ايـته ن آدامي تاپارلار! او واريدي، او ياشاييردي و بير سٶزله او ايتمه ميشدي. ايته ن وارسا دا او بيزيک!!! اولسايديق، ياشاسايديق او بير ايلي يارادانلاري، او بير ايلي ياشادانلاري و او بير ايلين تاريخيني اٶز ياشاملاري ايله ياشادانلاري ان آزي بو ايللرده تک بوراخمازديق...

اٶزوموزو بير دوغال دوشونجه نين داشيييجيسي کيمي تقديم ائديريک، آنجاق حيات فاجيعه لري ايله دوشونجه نين سٶنمه سينه ايمکان وئرمه يه نلرين هارادا اولمالاريني، ياشاييش نئجه لييي حاقدا هئچ دوشونمک ده بئله ايسته ميريک.

و ان دهشتليسي اونوتقانليقدان توره يه ن بيگانه ليييميزدير. ايسماعيل شمس`نين اٶلومو هئچ بيريميزي تاثيرله نديرمه دي! بير خبر، آردينجا دا بٶيوک به يˊيين بير تسلييتي. داها هئچ نه...

ايسماعيل شمس جانلي بير تاريخديرسه، ايندي آنجاق بير تاريخدير و تاريخ اولاراق قالاجاق. آنجاق سيبئرˊين سازاغيندان داها دا قورخونج اولان سوکوت دا اٶلومونو هئچ جوره باشا دوشموره م.

پنجره شوشه لرينين او بيري اوجونا قارانليق چٶکوب، شاختا بير طرفدن قارانليق دا بير طرفدن! و بو قارانليقلا شاختاني آنجاق دامارلاريميزدا دونان بوزلارين اريتمه سي ايله آرادان قالديرابيله ريک...

کيمي گٶزله ييريک؟! نه يي گٶزله ييريک؟... !!!


Read more! posted by <21 Azer> | 9:41 AM
Azərbaycan Milli HökümətiAzerbaycan Demoqrat Firqesi
21 Azer - 1945-1946 South Azerbaijan (Iran)
سؤزوموز-بلاگ اسپات
سؤزوموز-پرشين بلاگ









email
archives
Photo Albums
پيشه ورى: يازيلار -نوشته ها
توركجه مقاله لر
مقاله هاى فارسى
English Articles
عكس- فيلم-راديو
سندلر-اسناد
كتاب شناسى
دئموقراتلار-دموكراتها
صفرخان قهرمانى
پان ايرانيست-دؤولت گؤروشو:ديدگاه پان ايرانيستى-دولتى
Counters
Rent Movies Online